Захирлын мэндчилгээ

dsc_8981

Их зохиолч Д.Нацагдорж болон Нийслэл хотоороо овоглосон түүхт номын сангийнхаа хамт олны нэрийн өмнөөс Та бүхний энэ өдрийн түмэн амгаланг айлтгая.

Учран золгоод буй энэ онд манай Хан-Уул дүүрэг дэх салбар номын сан байгуулагдсаны 70, Баянзүрх дүүрэг дэх салбар номын сан байгуулагдсаны 50 жилийн тэгш ой тус тус тохиож байна.

Энэ хугацаанд бид төвлөрсөн номын сангийн  хэмжээнд “Нийслэлийн хүн амын  боловсрол, соёл, мэдээлэл чөлөөт цагийн эрэлт хэрэгцээг хангахад чиглэгдсэн номын сан-ном зүйн үйлчилгээг үзүүлж, бие хүнийг бүтээлчээр хөгжүүлэх…” зорилгоо амжилттай биелүүлж улсынхаа номын сангийн хөгжилд манлайлагч байсаар ирлээ.

Бид олон улсад ашигладаг “Коха” програмыг үйлчилгээндээ анхлан нэвтрүүлж, төв болон салбар номын сангууд дундаа “Нэг картаар таван номын санд”, цаашлаад нийслэлдээ “Нэг картаар есөн номын санд” үйлчлүүлэх боломж нээгээд байна.

2018 онд Улаанбаатар хотын нийтийн төв номын сан НЗДТГ-ын “Аз жаргалтай хот” мөрийн хөтөлбөрийн “…номын сангийн үйлчилгээг орчин үеийн стандарт шаардлагад нийцсэн цахим хэлбэрт шилжүүлж, хүртээмжийг нь хоёр дахин нэмэгдүүлнэ…” гэсэн заалтыг хэрэгжүүлэх зорилгоор RFID (Radio Frequency Indentification-Радио давтамжит төхөөрөмж) технологийг үйлчилгээндээ нэвтрүүлэх зорилт тавин ажиллаж байна.

Ингэснээр номын сангийн үйлчилгээ илүү хялбар, хурдан, хүртээмжтэй болж иргэдийн мэдээлэл, мэдлэг олж авах боломж бодитойгоор нэмэгдэх юм.

Их хотын иргэн хэн боловч номын өргөөнд маань саатан тухалж, мэдлэг боловсролоо дээшлүүлж, оюун ухаанаа хөгжүүлж, чөлөөт цагаа идэвхтэй өнгөрүүлэхэд бидний үүд хаалга үргэлж нээлттэй байх болно.

Үеийн үед эрдэм, оюуны хур арвин байж, сайн үйлс, сайхан  сэтгэл ашид мөнх дэлгэрэх болтугай.

ЗАХИРАЛ Д.ИНДРА