Ном солилцох өдөрлөгөөр 70 гаруй номын солилцоо хийж фондоо баяжууллаа
“Аз жаргалтай хот” хөтөлбөрийн хүрээнд Нийслэлийн Соёл, урлагийн газраас санаачлан Улаанбаатар хотын нийтийн төв номын сангийн үйлчилгээг иргэдэд ойртуулах, уншигчдыг номтой нөхөрлүүлэх, номын сангийн фондын баяжилтийг сайжруулах, бусадтай номоо солилцох боломжийг бүрдүүлэх зорилгоор “Номоо солилцъё” аяны дөрөв дэхь удаагийн өдөрлөг 2017 оны 04-р сарын 01-д Д.Сүхбаатарын талбайд амжилттай зохион байгуулагдлаа.
Өдөрлөгийн үеэр ном солилцсон эхний 200 хүн зохион байгуулагчдаас бэлдсэн сугалааг сугалж Internom номын дэлгүүр, Шар доктор/Shar Doctor -ын бэлгүүдийг хожсон үйл ажиллагаа боллоо.
Уг үйл ажиллагааг Positive Mind – Эерэг сэтгэлгээ ТББ дэмжин оролцсон бөгөөд Hello UB ТББ-ынхан залуучуудын хамтаар Flash Mob хийж сонирхууллаа.
Энэ үеэр Хүүхдийн төв номын сангийн харъяа цахим номын сан жилийн эрхээ 33% хөнгөлөлттэй үнээр хямдруулж уншигчдад бэлэг барилаа.
Өдөрлөгт 500 гаруй ном сонирхогч, иргэд оролцож номоо солилцлоо. Энэхүү өдөрлөгийг сурталчилахаар МҮОНРадио болон бусад олон нийтийн хэвлэл, мэдээллийн байгууллагууд оролцлоо.
Хотын төв номын сангийн хувьд 30 гаруй хүнтэй 70 гаруй номын солилцоо хийлээ.
Мэдээ гаргасан: НБТҮТ-ийн эрхлэгч З.Төгсжаргал